ჰუმელსი ჰერტასთან მატჩს გამოტოვებს

მიუნხენის "ბაიერნის" ცენტრალური მცველი, მატს ჰუმელსი, გერმანიის ეროვნული ჩემპიონატის მომდევნო შეხვედრას გამოტოვებს.

ამის შესახებ ბერლინის "ჰერტასთან" საშინაო თამაშის წინ გუნდის მთავარმა მწვრთნელმა, ნიკო კოვაჩმა, პრესკონფერენციაზე ისაუბრა.

"მას გრიპი აქვს. როდესაც ამდენს მოგზაურობ, შენი იმუნური სისტემა სუსტდება, ამიტომ დაავადებაც მარტივად გეკიდება.

მატს ჰუმელსმა დღევანდელი ვარჯიში გამოტოვა, მაგრამ დაბრუნდა ჟერომ ბოატენგი, ამიტომ შაბათისთვის პრობლემა არ გვექნება", - განმარტა 47 წლის ხორვატმა სპეციალისტმა.

შაბათს, ჩვენი დროით 18:30 საათზე, მიუნხენური კლუბი ბერლინის "ჰერტას" ბუნდესლიგის 23-ე ტურის ეგიდით შინ დაუპირისპირდება.