"ხვალინდელი მატჩი განსხვავებული იქნება.." - ბუსკეტსი ბაიერნთან მატჩის წინ

ხვალ, 14 სექტემებრს, თბილისის დროით 23:00-ზე, ჩემპიონთა ლიგის ჯგუფური ეტაპის პირველ ტურში ერთმანეთს ბარსელონა და მიუნხენის ბაიერნი დაუპირისპირდებიან.

აღნიშნული მატჩის წინ, ბარსელონას ესპანელმა ნახევარმცველმა სერხიო ბუსკეტსმა პრესკონფერენცია გამართა და მოსალოდნელ დაპირისპირებაზე ისაუბრა:

'ძალიან ძლიერი მეტოქე გვყავს. ასეთ მატჩში, პირველი გოლის გატანა მნიშვნელოვანი იქნება, თუმცა ჩვენ წინააღმდეგ მაღალი დონის გუნდი ითამაშებს - ვაპირებთ ჩვენი თამაში ვითამაშოთ.

ვიცით, რომ მესი აღარ გვყავს - მაგრამ, ვეცდებით ჩვენი საქმე გავაკეთოთ. ამიერიდან ახალი ერა იწყება, წინ კი რთული მატჩი გველოდება. ვაცნობიერებთ ამჟამად არსებულ სირთულეებს, მაგრამ ჩვენი სურვილია, რომ ძლიერ გუნდად ჩამოვყალიბდეთ, რაც დამატებით მოტივაციას გვაძლევს.

ბაიერნთან 2-8 წაგება რთული იყო, თუმცა ფეხბურთი ასეთია - ხვალინდელი მატჩი განსხვავებული იქნება!', - განაცხადა ბუსკეტსმა.

ჟურნალისტის მიერ დასმულ კითხვას, რომელიც ბარსელონას ტაქტიკურ მონახაზს შეეხებოდა, სერხიომ ასე უპასუხა:

'რაც ნაკლებად პროგნოზირებადი ვიქნებით, მით უკეთესი.'