მათეუსი ჰავერტცი ბაიერნს იდეალურად მოერგება

მიუნხენის "ბაიერნის" ყოფილმა კაპიტანმა და ნახევარმცველმა, ლეგენდარულმა ლოთარ მათეუსმა, ახალგაზრდა გერმანელი სუპერ-ტალანტი კიდევ ერთხელ შეაქო.

"ვფიქრობ, კაი ჰავერტცი "ბაიერნს" იდეალურად მოერგება. ნებისმიერ შემთხვევაში, ბედნიერი ვარ, რომ ის ბუნდესლიგაში რჩება, ვინაიდან ამ სეზონს ლევერკუზენის "ბაიერში" ჩაატარებს.

ამის შემდეგ კი იმედს ვიტოვებ, რომ მას გერმანული კლუბები არ დათმობენ, მაგრამ ცხადია იქნება სერიოზული ინტერესი ესპანეთიდან და ინგლისიდანაც.

კაი ინტელექტუალური მოთამაშეა, რომელსაც აქვს ყველაფერი იმისათვის, რომ მაღალ დონეზე ითამაშოს. ყველაფერთან ერთად, ის თავმდაბალია და მიწაზე ორივე ფეხით მყარად დგას.

ჰავერტცი სწრაფია, იღებს სწორ გადაწყვეტილებებს და ყველაფერს მარტივად აკეთებს", - განაცხადა მათეუსმა.

20 წლის კაი ჰავერტცი ლევერკუზენის "ბაიერის" ღირსებას იცავს და გაისად მიუნხენური გრანდი მის დამატებას ეცდება.